UFO capital of the world ” എന്ന വിശേഷണം ചാര്ത്തിക്കിട്ടിയ സ്ഥലമാണ് ചിലിയിലെ San Clemente. കാരണം മറ്റൊന്നുമല്ല, തൊണ്ണൂറുകളുടെ മധ്യത്തില് നൂറുകണക്കിന് ആളുകളുടെ റിപ്പോര്ട്ടുകളാണ് പറക്കും തളികകളെ കണ്ടു എന്ന് അവകാശപ്പെട്ട് ഇവിടെ നിന്നും അധികൃതര്ക്ക് ലഭിച്ചത്. സാന്റ്റിയാഗോയില് നിന്നും ഏകദേശം 240 km തെക്ക് മാറിയാണ് മഞ്ഞുമൂടിയ ആണ്ടീസ് പര്വ്വത നിരകളുടെ ചെരുവില് സാന് ക്ലമെന്റ്റെ സ്ഥിതിചെയ്യുന്നത് .
ഹിമാവൃതമായ ഗിരിശൃംഗങ്ങളും തണുത്ത് കെട്ടടങ്ങിയ അഗ്നിപര്വ്വതങ്ങളും ചിലിയിലെ ഏറ്റവും വലിയ കൃത്രിമ തടാകമായ Colbún Lake ന്റെ സാന്നിധ്യവും കൂടെയാകുമ്പോള് സാന് ക്ലമന്റെയുടെ നിഗൂഡ സൗന്ദര്യം സന്ദര്ശകരുടെ മനസ്സിനെ ലഹരി പിടിപ്പിക്കും . എന്തായാലും ചിലിയന് ടൂറിസം വിഭാഗം വെറുതെയിരുന്നില്ല . ആളുകള് പറക്കും തളികകളെ കണ്ടു എന്നവകാശപ്പെടുന്ന സ്ഥലങ്ങളെ എല്ലാം കോര്ത്തിണക്കി ഒരു ടൂറിസം റൂട്ട് തന്നെ അവര് ഉണ്ടാക്കിയെടുത്തു . UFO trail എന്ന് പേരിട്ടിരിക്കുന്ന ഈ പാതയ്ക്ക് ഏകദേശം മുപ്പത് കിലോമീറ്ററുകളോളം നീളമുണ്ട് . Colbún തടാകവും , തീരങ്ങളും പുണര്ന്ന് മുകളിലേയ്ക്ക് കയറുന്ന പാത ചെറു കുന്നുകളെയും പുല്മേടുകളെയും തഴുകിയാണ് ആണ്ടീസ് നിരകളിലേക്ക് മെല്ലെ കയറുന്നത് . കുതിര മാത്രമാണ് ലഭ്യമായ ഏക വാഹനം .
|
UFO Trial MAP |
ഏകദേശം നാല് മണിക്കൂറുകളോളം കുതിര സവാരി ചെയ്ത് സന്ദര്ശകര് അവസാനം എത്തുന്നത് ഏഴായിരം അടി മുകളില് ഉള്ള El Enladrillado എന്ന സ്ഥലത്താണ് . യാത്രയിലെ ഏറ്റവും വിചിത്രമായ സ്ഥലമാണ് El Enladrillado. കാരണം മറ്റൊന്നുമല്ല , ഇത് മല മുകളിലെ നിരപ്പായ ഭൂമിയാണ് .
|
El Enladrillado |
അവിടെയാകട്ടെ ആരോ നിരപ്പായി കല്ലുകള് പാകിയിരിക്കുന്നു ! . 233 കല്ലുകളാണ് വശങ്ങള് ചെത്തിമിനുക്കി ഈ മലമുകളില് നിരപ്പായി ഇടവിട്ട് പാകിയിരിക്കുന്നത് . ഇതിലെന്താ ഇത്ര അത്ഭുതം എന്നല്ലേ ? ഇതില് ഓരോ കല്ലിനും പത്തു ടണ്ണോളം ഭാരമുണ്ടന്നു പറഞ്ഞാലോ !!! .
|
Stones on El Enladrillado |
സത്യത്തില് യാത്രയുടെ ക്ലൈമാക്സില് സഞ്ചാരികള് ഈ കല്ലുകള് കണ്ടു അന്തംവിടും . ഏതോ അതിപുരാതന മനുഷ്യവംശം ആണ് ഈ വിചിത്ര നിര്മ്മിതികളുടെ പിറകില് എന്ന് സ്ഥലവാസികള് ആരോപിക്കുമ്പോള് അതല്ല വോള്ക്കാനിക്ക് ആക്റ്റിവിറ്റിയുടെ പരിണിതഫലമാണ് ലാവ തണുത്തുറഞ്ഞുണ്ടായ ഈ കല്ലുകള് എന്ന് മറുഭാഗം വാദിക്കുന്നു . എന്നാല് രണ്ടുമല്ല , ഇത് പറക്കും തളികകളുടെ ലാണ്ടിംഗ് പാഡ് ആണെന്നും ഇത് നിര്മ്മിചത് അന്യഗ്രഹജീവികള് ആണെന്നും ആണ് മൂന്നാമതോരുകൂട്ടര് വാദിക്കുന്നത് . സത്യത്തില് മൂന്നുകൂട്ടര്ക്കും അവരുടെ വാദഗതികള് സ്ഥാപിച്ചെടുക്കുവാന് പറ്റിയ തെളിവുകള് ഇല്ലാ എന്നതാണ് സത്യം .
|
Cerro Azul - Volcano |
എന്തൊക്കെയാണെങ്കിലും ഇവിടെ നിന്നുള്ള കാഴ്ച അവിസ്മരണീയമാണ് .പടിഞ്ഞാറ് മേഘങ്ങള്ക്ക് മീതെ തല ചെത്തി വിട്ടതുപോലെയൊരു മല ! അതാണ് Volcán Descabezado. എന്ന് വെച്ചാല് ‘Headless Volcano’ എന്നാണ് അര്ഥം . ഇത് ഒരു അഗ്നിപര്വ്വതത്തിന്റെ ലാവാ ഗര്ത്തമാണ്. തൊട്ടടുത്ത് പന്ത്രണ്ടായിരം അടി മുകളില് സജീവ അഗ്നിപര്വ്വതമായ Cerro Azul . യാത്രക്കിടയില് UFO യെ കാണാം എന്നുള്ള ഉറപ്പൊന്നും ചിലിയന് സര്ക്കാര് സന്ദര്ശകര്ക്ക് നല്കുന്നില്ല എങ്കിലും ഈ സഞ്ചാരം യാത്രികരെ മറ്റൊരു തലത്തില് എത്തിക്കും എന്നുറപ്പാണ് .
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ
നിങ്ങളുടെ അഭിപ്രായങ്ങൾ അറിയിക്കൂ